100 aña MCB

Na aña 1916 a funda Maduro’s Bank. E kompania komersial S.E.L. Maduro & Sons tabata anhelá pa basta tempu pa funda un banko. E kompania ya kaba tabata ofresé servisionan bankario manera duna fiansa i emití bono. Na aña 1901 i despues atrobe na aña 1906, e famia Maduro a hasi un petishon pa lanta un banko ofisialmente. Den e okashonnan ei no a honra nan petishon. Gobièrnu hulandes tabata preferá di tin un dunadó di krédito hulandes den e kolonia Karibense.

Tur esaki a kambia na aña 1916. Bataafsche Petroleum Maatschappij ya tabata hasiendo e preparativonan pa konstruí un refineria di petroli na Kòrsou. I dia 20 di òktober di e mesun aña a funda e NV, Curaçaosche Petroleum Maatschappij, (C.P.M).

Yegada di e industria petrolero a hasi ekspanshon i modernisashon di e sektor bankario nesesario. Dia 22 di sèptèmber 1916, famia Maduro a bolbe entregá un petishon pa por lanta un banko ku tin derechi di emishon. Pa dia 30 di sèptèmber ya kaba korant Amigoe a kuminsá anunsiá establesimentu di e banko nobo di famia Maduro. E biaha aki Gobernador a aprobá e statutonan di e banko di inmediato i e empresa por a kuminsá ofresé su servisionan for di 1 di yanüari 1917. Den e banko nan por a sigui hasi i ofresé e mesun transakshon i servisionan ku nan tabatin ta hasi i ofresé komo empresa/kas komersial pa mas di 30 aña kaba. Banko Maduro a bira e promé banko komersial di kolonia Kòrsou.

Miembronan di famia Maduro, kabesantenan di e kompania komersial S.E.L. Maduro & Sons, a partisipá ku tres kuart di e kapital di un mion florin. E sobrá dosshen sinkuenta mil florin a bini di sr. J.J. Alvares Correa, di e empresa Correa Hermanos & Cia. Di e manera ei el a bira e akshonista individual di mas grandi. Banda di esei sr. Correa a haña e enkargo pa fungi komo direktor di e banko nobo.

For di su inisio, Maduro’s Bank tabata enbolbí den e diferente desaroyonan den ekonomia di Kòrsou. Durante su eksistensia, e banko aki lo a fasilitá fiansanan na empresarionan ku tabata dispuesto pa kore e riesgo pa lanta negoshinan/empresanan ku por a generá mas kupo di trabou i prosperidat pa Kòrsou.

E kresementu ekonómiko ku Kòrsou a eksperensiá ku yegada di e kompania di petroli tabata di sumo importansia pa kresementu di Maduro’s Bank. Nan a negoshá ku un porsentahe di tur e transakshonnan di e kompania di petroli lo a sosodé via di e banko. Pa aña 1929, Shell tabata ofresé un kantidat di 11.000 kupo di trabou den un komunidat di en total 44.000 habitante. I pa e aña ei e suma ku refineria tabata saka na pagonan a yega te 24 mion florin, ekivalente na mas ku sinku biaha e total di entrada di gobièrnu di Kòrsou. Tur esakinan tabatin un efekto profundo rib’e ekonomia di Kòrsou. E kresementu ekonómiko di añanan ‘20 a pone ku dia 1 di yüli 1927 un banko komersial mas, Curiel’s Bank, a habri su portanan pa públiko. Ya pa basta aña e kompania komersial Morris E. Curiel & Sons tabata realisá  aktividatnan finansiero, spesialmente transakshonnan di kambio di divisa. Pues tabata un paso relativamente fásil pa pasa esaki ofer den un entidat separá.

E kapital di e banko tabata 500.000 florin. El a tuma 1,7 mion florin den forma di depósito ofer di e kas di komèrsio anterior. Pa fin di aña 1929 ya e suma invertí a subi te 3,7 mion florin.

Entre 1931 i 1935 tur sektor di nos ekonomia a eksperensia un reseshon, komo konsekuensia di e krísis mundial ekonómiko: e refineria di petroli a duna 50% di su trahadónan retiro, importashon a baha ku 60% i entrada di gobièrnu di Kòrsou a baha ku 20%. Den Punda, hopi negoshi a kambia di doño i otro negoshinan a sera òf bati bankarota. Durante e añanan di krísis aki, difísilmente por a oumentá e fiansanan. Pa por fortifiká nan situashon finansiero den tempunan asina difísil, e bankonan Maduro’s Bank i Curiel’s Bank a skohe pa hasi un fushon. For di 1 di yanüari 1932 a nase un banko nobo, Maduro & Curiel’s Bank.

Durante Segundo Guera mundial a lòs Kòrsou for di e florin hulandes. E florin kurasoleño a haña un státus independiente. E Curaçaose Muntregeling di 1942, a drenta na vigor for di 3 di sèptèmber 1943. For di e dia ei por papia ofisialmente di e sistema monetario Kurasoleño.

Durante e añanan di guera e suma di kasa di Maduro & Curiel’s Bank a oumentá di 2,6 mion florin na 1940 te 22,4 mion florin na 1944, komo ku e tempu ei no tabatin niun òf poko posibilidat di invershon atraktivo. Pa motibu di eskases di posibilidat di invershon, banko a baha e interes di fiansa pa su klientenan i finalmente depositá mas ku 20 mion liber di interes den e seif di Curaçaosche Bank.

Durante e mesun añanan ei, Venezuela a aprobá un lei ku a resultá perhudisial pa e refineria di Kòrsou. Segun e konseshonnan hasí, e refineria di Kòrsou por a prosesá solamente petroli venezolano. Kòrsou no por a prosesá petroli prosedente di otro pais mas. P’e motibu ei, Shell a hañ’e obligá di konstruí un refineria nobo yama “El Cardon” na Paraguaná, Venezuela. Tabata permití pa modernisá e refineria na Kòrsou pero no ekspandé.

E refineria a kuminsá un proseso di reorganisashon i outomatisashon. Kòrsou a kuminsá apliká un maneho di diversifikashon di ekonomia. A kuminsá invertí den konstrukshon di motèlnan i otro tiponan di industrial nobo pa asina ta ménos dependiente di e refineria. Maduro & Curiel’s Bank a partisipá den esaki aktivamente, ekstendiendo fiansanan i kapital inisial na empresarionan. Algun ehèmpel ta Curaçao Intercontinental Hotel na entrada di haf den Punda, Curaçao Hilton, Flamboyant Beach Hotel, Country Inn, San Marco, Holiday Inn i Arthur Former na Parasasa, Antilliaanse Verffabriek, Amstel Brouwerij, Antilliaanse Luchtvaart Maatschappij, Dok Maatschappij, i Texas Instruments.

E kuponan di trabou di refineria a alkansá su kantidat di mas haltu di 12.600 persona na aña 1952. E konsekuensianan di e reorganisashon i outomatisashon a bira visibel den e periodo despues di 1957, ora ku e nesesidat di personal lokal a baha di 12.000 pa 4500 persona, inkluso kontratistanan, durante un periodo di 10 aña. E kantidat total di entrada ku e industria di petroli tabata generá a baha di mes un manera: 63 mion i mei florin na aña 1955, un oumento te na 83 mion florin na aña 1957 i seguidamente un deterioro di entrada anual ku a baha te na ménos ku 58 mion florin na aña 1968.

Maduro & Curiel’s Bank no tabata un blanko durante di e disturbionan ku a tuma lugá durante e marcha di 30 di mei 1969. Dianan despues di e protestanan, Cedric Ritchie, Chief General Manager di Bank of Nova Scotia (BNS), a tuma kontakto ku gerensia di MCB i ofresé su sosten pa por si a kaso MCB lo a eksperensiá kualke problema en konekshon ku e disturbionan. E gesto aki a krea un fundeshi pa koperashon, basá riba konfiansa mutuo. Diesseis aña despues, na òktober 1970, a sera un asosiashon ku e banko kanades, Bank of Nova Scotia. Na mes momentu, a sera un akuerdo di koperashon ku Bank Mees & Hope di Hulanda. E repartishon di akshonnan tabata lo siguiente: 30% di akshonnan a bai pa Nova Scotia Bank, 10% pa Bank Mees & Hope i 60% a keda den man di e akshonistanan original. MCB a transformá su mes den un banko hiper moderno, ku orientashon internashonal, ku ta ofresé produkto i servisionan inovadó. Esaki hustamente a reforsá su karakter lokal. MCB a bira un ‘Banko Amigu’, un banko pa tur hende, ku ta duna atenshon personal na su klientenan. 

Na aña 1975 a kumpra e akshonnan di Bank Mees & Hope bèk despues ku un otro banko hulandes a tuma esaki ofer. A parti e akshonnan aki, ekivalente na 10%, di tal manera ku e repartishon a bira lo siguiente: 51% pa e akshonistanan original i 49% pa BNS. For di 1975 e gerensia di MCB ta konsistí di tres direktor, di kua BNS ta apuntá unu.

No ta solamente MCB a eksperensiá un metamorfósis for di aña 1970, sino e henter e sektor finansiero di Kòrsou a kambia for di fin di añanan '60 di un sektor prinsipalmente lokal pa un sektor mas internashonal, den kua e ròl di bankonan internashonal a bira kada bes mas grandi. Spesialmente e sektor di offshore ku ta operá riba nivel internashonal tabata masha eksitoso i generá hopi entrada di impuesto pa Kòrsou. Entre 1970 i 1995 e sektor ei a generá aproksimadamente 4 miar i mei florin na ingresonan di impuesto. MCB tabata partisipá den e sektor aki ku MCB Trust Company i ku AMACO NV.

MCB tambe a invertí den e industria di turismo den añanan '70 i '80. Ya for di e dékada anterior MCB a hunga un ròl importante den e binida di Hazeleger Hotel i proyekto di Hilton. Durante e dos dékadanan ku a sigui, MCB a inisiá dos proyekto nobo grandi den besindario di  Hilton. Konstrukshon di International Trade Center (ITC) na 1984 i konstrukshon di un hotèl di sinku strea dirèkt banda di Hilton Hotel, i dilanti ITC: Sonesta Hotel, di kua a presentá e plannan inisial na aña 1989. Na aña 1992 a finalisá e proyekto. I na aña 1999 e hotèl aki a pasa pa e kadena di hotèl Marriott.

Alrededor di kambio di siglo Kòrsou a hañ’e ta apliká un sanashon ekonómiko drástiko. Pa motibu di un eskases monetario kresiente, gobièrnu di Antia a hañ’e obligá di buska yudansa di Internationaal Monetair Fonds (IMF) i apliká un maneho di sanashon estriktamente liberal. Konsekuentemente e ekonomia a kremp. Empresanan manera Antilliaanse Luchtvaart Maatschappij mester a sera i a redusí un gran parti di e aparato di ámtenar. Esaki a okashoná un fluho di migrashon pa espesialmente Hulanda. E kantidat di habitantenan na Kòrsou a baha.

Despues di e referèndùm di 2005, a skohe un trayekto nobo ku a kondusí na formashon di Pais Kòrsou i sanashon di e debe monetario di gobièrnu. Pa MCB esaki a nifiká básikamente ku na lugá di invertí den bononan di gobièrnu, a surgi espasio pa invertí den proyektonan nobo. Ta di spera ku un megaproyekto lo bolbe bati na porta di Kòrsou, meskos ku 100 aña pasá, i kisas n’e mesun tereno na Schottegat?

Por kopia e teksto aki solamente ku menshon di e fuente: Archivo Nashonal Kòrsou.