Bista for di parti pabou di Schottegat

Den e promé fase di konstrukshon di bibienda a krea Negropont, un isla ku bibienda mei mei di Schottegat. Entre 1915 i 1923 ta traha 12 kas einan. Despues a sigui konstrukshon di hopi kas mas. Sin embargo, esaki no a sosodé di forma organisá. Pa hopi tempu kayanan di e bario aki no tabatin nòmber. Despues e kayanan a haña nòmber di pintornan hulandes mundialmente konosí.  

No opstante e krísis di añanan 1930 e kantidat di trahadó a subi te ku mas di ocho mil. Na promé instansia e kasnan tabata estilo di bùngalo, di un piso, pero despues, pa skapa espasio, a kuminsá konstruí bai laira. Tambe a surgi, pa promé biaha rib’e isla, kasnan trahá na rei i konektá na otro, kos ku tabata algu kompletamente nobo pa Kòrsou.   

Kolekshon di Van Leeuwen

Alrededor di aña 1930 tabatin mas o ménos 200 bibienda na Negropont. Awendia ya no tin rastro di niun di nan, ku eksepshon di e kas di e direktor di Shell, ku ainda ta eksistí; unu ku lo por pas den kualke bario di vila na Hulanda.

Despues di segundo guera mundial a sigui un di tres fase di konstrukshon, ku lo sigui te mitar di añanan ’50. Na Groot Piscadera, kaminda ya a konstruí algun kas di mas di un piso, a krea un 160 kas mas i forma un bario ku a hasa e nòmber di Julianadorp. Karakterístiko pa e proyekto di konstrukshon di bibienda aki, ta ku na momentu di traha e kasnan a tene kuenta ku nos bientu di pasat, kontrali na e kasnan di e promé fase di konstrukshon. E forma di traha kas hulandes a traha liga pa e manera di traha kas pa klima tropikal.

E kampamentu di barak ku a krea na Suffisant pa trahadónan estranhero riba kontrakt, promé ku guera mundial, a krese den añanan ‘50 i desaroyá den dos bario; Surinamedorp en Suffisantdorp.

Suffisant den konstrukshon. Kolekshon di Fischer.

A tuma ofer e mesun modèl di komunidat segregá di e kampamentunan di barak, (promové pa gobièrnu), den e barionan. Por ehèmpel, kada grupo étniko tabatin su propio klup. Mayoria di e bibiendanan tabata konsistí di asina yama ‘bùngalonan di soltero’, kaminda diferente hende hòmber soltero òf di kua nan famia tabata biba den estranhero tabata permanesé den un bibienda.Tur hende tabatin nan propio kamber i tabata kompartí sala. No tabatin kushina. Trahadónan mester a kome den un dje kushinanan pa uso general den bario. No tabata asina tampoko ku tur e kasnan tabatin un baño. Den e kaso ku no tabatin baño, e trahadónan por a akudí na kasnan di baño. Despues ku Shell a bende e bario Suffisant den añanan ’70, por a mira un transformashon. E harmonia arkitektóniko a disparsé. A rekonstruí i fèrf hopi kas segun propio gustu, loke a resultá den un bario masha kolorido. 

Kolekshon di Van Soest 

Na 1951 a kuminsá konstruí un bario nobo pa employénan lokal na Cas Cora. A konstruí nobenta kas prefabriká; tur e partinan di kas tabata yega ya kompletamente kla for di Hulanda. Despues di 1952, ku tabata un aña super eksitoso, e refineria a pasa pa tempunan ménos eksitoso i pa motibu di entre otro e entrada di outomatisashon, e kantidat di trahadó a disminuí i e nesesidat di konstrukshon di mas kas a disparsé.

Cas Cora – na man robes Radulphus College, Kolekshon di Fischer.

Damacoor, situá na Schout-bij-Nacht-Doormanweg, den konstrukshon.


Kolekshon di Fischer 

Damacoor, situá na Schout-bij-Nacht-Doormanweg i na man robes ariba e konekshon pa Snipweg.


Kolekshon di Fischer

Na kuminsamentu di añanan ’70, refineria a eksperensiá un periodo korto di bonansa durante kua a disidí di krea un bario di 160 kas den Brievengat, i dun’é e nòmber Schelpwijk. E diferensia ku otro proyektonan di bibienda ya ehekutá, tabata ku na Schelpwijk si no a yega asina leu di añadí otro fasilidatnan manera kancha deportivo, tienda i establesimentunan di kuminda.

Portrèt: Ofisina prinsipal di SHELL, kolekshon di Fischer.


Fuentenan:
• Een Eeuw Architectuur op Curacao, Ronald G. Gill. Curacao, 1999. p. 25-44.
• Bulletin KNOB 92 (1993) 1-2. Orde Versus Chaos; Het Shell-tijdperk binnen de stadsgeschiedenis van Willemstad/Curacao (1920-1960), Mariette Kamphuis. p. 31-33.
• Buurtprofielen Ministerie van Sociale Ontwikkeling, Arbeid en Welzijn uit 2008 http://www.gobiernu.cw/
• 100 Jaar Olie op Curaçao, Ton de Jong. 2015.
• 100 Jaar Raffinaderij op Curaçao, Max Scriwanek. 2015.