Failnan ku ta bou di maneho di Archivo Nashonal ta birando mas i mas aksesibel digitalmente. Riba inisiativa di Archivo Nashonal, a bira posibel pa konsultá e índisenan di Registro Sivil via internèt. Banda di esei Archivo Nashonal ta sostené proyektonan di digitalisashon i tambe proyektonan di interkambio ku ta importante pa historia di Kòrsou. Den e kuadro aki a pone datonan, di katibunan ku a rekobrá nan libertat, online. Banda di esaki por konsultá e parti kurasoleño di e archivo di West Indische Compagnie via internèt i pronto tambe lo por konsultá e “New Amsterdam Papers” (Archivo na Albany, New York) online.
Un proyekto ku ta hopi importante pa Archivo Nashonal, ta konvershon di tur inventario di archivo den e programa Memorix. Esaki ta un programa webbased ku ta brinda e oportunidat pa konsultá e inventarionan via internèt. Anteriormente tabata usa e programa Access to Memory (AtoM), ku ta un programa open source ku e kompania kanades Artefactual, a desaroyá bou di supervishon di International Council on Archives). Dosentenan di tantu Artefactual komo Hogeschool Amsterdam a bini Kòrsou pa duna kolaboradornan di Archivo Nashonal diferente kurso, p’asina nan por familiarisá ku e programa. Banda di esaki kolaboradó i boluntarionan di Archivo Nashonal sigui diferente kurso di Picturae, un kompania eksperto den entre otro hasi fuentenan di archivo aksesibel riba internèt. Picturae ta tambe produktor di aplikashon Memorix ku aktualmente ta keda usá pa hasi e inventarionan aksesibel via internèt.
For di 2017 e inventario, potrèt i índisenan pa investigashon genealógiko ta aksesibel riba internèt di forma digital. Na 2016 a introdusí e Banko di Imágen digital i na 2017 e inventario i índisenan pa informashon genealógiko a bira aksesibel via di wèpsait di Archivo Nashonal.
