Introdukshon den legislashon di archivo

Algun pregunta frekuente:

Embergadura (Pa ken òf kiko e lei aki ta bálido?)

• E lei di Archivo ta bálido tambe pa NV nan di gobièrnu manera CUROIL, UTS, Aqualectra, ets.?

  Si. E lei ta konta pa tur órgano di gobièrnu. Den e Nieuw Burgerlijk Wetboek – i den e lei aki – ta referí na nan komo “tur órgano ku ta keda instituí segun Publieksrecht“. E NV nan di gobièrnu i fundashonnan ta kai bou di eseinan. Nan tambe tin e obligashon di mantené nan archivonan den bon estado, kuida, ordená, selektá i traspasá nan.

• E lei ta konta pa failnan digital òf únikamente pa dokumentonan di papel?

  E lei ta konta pa failnan digital tambe (pa tur informashon risibí durante òf ku a forma su mes via un proseso di gobièrnu, sin importá nan forma). 

Mantenshon, Maneho i Supervishon

• Kiko ta e diferensia entre e tres responsabilidatnan aki?

  E mantenshon ta un responsabilidat gubernamental. E funshonario ku tin e  responsabilidat máksimo pa ku maneho di archivo, e minister, ta un funshonario ku mester responsabilisá su aktonan na parlamento di su pais. E tareanan di kuido ta: e ta responsabel pa ofresé e medionan nesesario pa por ehekutá un bon maneho, manera alokashon adekuá, leinan/legislashon, finansa, formashon di e supervisornan/funshonarionan di maneho. Durante e promé 20 añanan di e siklo di bida di e informashon di gobièrnu, e funshonario di responsabilidat máksimo ta e minister ku e servisio di archivo ta kai bou di dje. Despues di 20 aña, - huntu ku e mudansa físiko di e informashon pa Archivo Nashonal -  ta traspasá e responsabilidat pa minister di Maneho di Gobernashon, Planifikashon i Servisio.
  
  E maneho ta un responsabilidat gubernamental. E funshonario di maneho ta ehekutá e trabounan rutinario ku ta sòru p’e informashon tin i mantené un estado bon, ordená i aksesibel. E promé 20 añanan e funshonario di maneho ta e Recordsmanager di e servisio di gobièrnu. Despues di 20 aña ta traspasá e maneho p’e Archivero General di pais. Ta traspasá e archivo, unabes selektá, di manera físiko pa Archivo Nashonal.
  
  E funshon di supervishon ta kai bou di e Archivero General di pais. Esaki ta keda enkargá di e maneho despues ku e archivo hasi 20 aña. P’e motibu aki e mester sa den ki estado e archivonan ta, ku kua sistema a hasi nan aksesibel i kuantu espasio mester reservá den e depósito archivo nashonal. Tambe ta inspekshoná e maneho di selekshon; pa kontrolá si e servisionan ta hasi selekshon i ta implementá e kriterio i proseduranan korektamente. E funshonario di maneho ta guia e fluho selektivo di e fail i dokumentonan pa e depósito di archivo nashonal, i asina tambe nan proseso di bira públiko!

Akseso di públiko

• Kon akseso di públiko na dokumentonan te ku 20 aña, i dokumentonan mas bieu ku 20 aña ta reglá den nos pais?

  Informashon di gobièrnu ku tin ménos ku 20 aña ta kai bou di Landsverordening Openbaarheid van Bestuur (LOB) PB 1995, no. 211. E ta stipulá ku un órgano di gobièrnu mester ofresé informashon tokante su maneho i ehekushon, di propio inisiativa. E ta duna tambe tur siudadano ku hasi petishon pa un informashon spesífiko, derechi pa haña esaki, pero si teniendo kuenta ku e 11 limitashonnan stipulá pa ku e fase di siklo di bida aki (ménos di 20 aña). Pues tin posibilidat ku bo ta risibí un parti òf kopia di e dokumento original ku bo a pidi, i ku riba dje, a hasi tur e partinan ku ta koinsidí ku e 11 eksepshonnan pretu.
  
  Dokumentonan di mas ku 20 aña ta kai bou di e Lei di Archivo. En prinsipio, asina ku traspasá e dokumentonan pa Archivo Nashonal nan ta bira kompletamente públiko. Den e fase ei, siudadanonan tin derechi di konsultá e dokumentonan original gratuitamente (na Archivo Nashonal). Di e 11 eksepshonnan di e fase primario, ménos ku 20 aña, a sobra 3 awendia:
  - Protekshon di e bida personal
  - Prevení trato of husgamentu desproporshonal di e personanan natural of hurídiko
  - Seguridat Nashonal.
  
  Sin embargo, e eksepshonnan ta kaduká despues di 70 aña.

Selekshon i Destrukshon

• Ta permití pa funshonario di maneho/supervisor destruí un archivo?

  Si. Destrukshon ta asta obligatorio. E ta forma parti di e maneho rutinario. Sin embargo mester sigui un prosedura masha kouteloso promé ku por prosedé pa destruí material. Henter e prosedura ta deskribí den e Dekreto di Archivo, artíkulo 2-9.
  
  E partinan mas importante ta:
  - E dokumentonan ku mester ser destruí, mester ta spesifiká riba un lista
  - E lista aki mester ta akordá tantu pa e hefe di servisio konserní ( eksperto ku por husga nan importansia p’e organisashon) komo pa e Archivero General di pais (ku ta supervisá e maneho i por husga e importansia históriko di e material) 
  - Mester traha prosès verbal di e destrukshon real.
   

Sustitushon

• Nos por sustituí nos archivo di papel dor di digitalisá esaki?

  Si. E lei aki ta duna esei komo posibilidat di sustitushon. Sustitushon por tuma lugá únikamente ku pèrmit di minister i pa medio di un apoderashon di e inspektor di archivo. Den dado kaso lo inspekshoná e servisio mas intensivamente. Pa mas informashon por tuma kontakto ku e departamento di  Inspekshon i Atkisishon di Archivo Nashonal.