E traspaso di dokumentonan di archivo pa Archivo Nashonal ta reglá den artíkulo 17 i 18 di Archieflandsverordening (Lei di Archivo). Loke ta importante pa tene kuenta kuné ta ku:
- Mester traspasá archivonan di tur instansia di gobièrnu despues ku nan kumpli 20 aña
- Por traspasá solamente e dokumentonan ku mester keda konservá
E lastu punto menshoná ta nifiká ku mester selektá e dokumentonan promé i saka e dokumentonan ku por destruí afó.
Traspaso ta un tarea di e funshonario di responsabilidat máksimo. Esei ta nifiká ku e minister responsabel mester ta na altura di esaki. Traspaso di dokumentonan di ménos ku 20 aña pa Archivo Nashonal ta posibel pero mester konsultá promé ku Archivero General di pais. Loke tambe por sosodé ta ku tin dokumentonan mas bieu ku 20 aña ku ketubai ta ser konsultá regularmente i pa kua por pidi pa posponé e traspaso. E minister responsabel te úniko ku por akordá un suspenshon di un periodo máksimo 10 aña.
Na momentu ku traspasá e archivonan, nan ta kai bou di maneho di e Archivero General di pais. E traspaso ta un asina yama traspaso di maneho. E funshonario di maneho di archivo i e funshonario di maneho di Archivo Nashonal (Archivero General di pais) ta firma un akta di traspaso. Den e akta ta indiká tambe kua dokumentonan no por hasi públiko (por lo pronto). Pero en prinsipio dokumentonan ta bira públiko for di momentu ku traspasá nan. E término di disponibilidat públiko ta 20 aña.
Posibel/Eventual limitashonnan di disponibilidat públiko ta kaduká despues di 70 aña.
