Kiko ta inspekshon di archivo i kiko e ta nifiká?
Den poko palabra, inspekshon di archivo ta supervisá e maneho di informashon i archivo di gobièrnu. E supervishon aki ta reglá den Archieflandsverordening 2007 (P.B. 2008 no. 7) artíkulo 3 i ta ser ehekutá pa e departamento di inspekshon di Archivo Nashonal.
Pa evitá kualke konfushon ta nesesario pa aklará e término ‘archivo’. Archivo, esta informashon mara na un proseso di trabou, ta forma e memoria di un organisashon. Instansianan di gobièrnu ta produsí informashon riba papel i digital, na ora di ehekutá nan tareanan i ta usa esaki pa diferente meta: komo sosten den trabou, komo prueba i komo responsabilisashon di nan aktuashon pa ku siudadanonan i gerensia. E kalidat di e informashon mará na un proseso di trabou ta di gran influensia pa prestashonnan di gobièrnu, gerensia i siudadanonan. E ta un kondishon pa transparensia, partisipashon di siudadano, responsabilisashon i hustifikashon, efisiensia i – pa término mas largu - patrimonio kultural históriko.
Supervishon di maneho di informashon i archivo ta un asuntu ku ta eksigí hopi kompromiso. Banda di e eksigensianan stipulá den e Lei di Archivo i Archiefbesluit (Dekreto di Archivo), tin leinan manera Landsverordening Openbaarheid Bestuur, Beschikking Digitaal Beheer ku tambe ta enserá sierto obligashonnan pa ku maneho di informashon i archivo. Banda di e aspekto legal, un inspekshon di archivo su intenshon ta tambe pa kontribuí na desaroyo di un organisashon. Meskos ku, un investigashon di akountent riba tereno di maneho finansiero òf un ouditorio riba tereno di atministrashon di empresa, un inspekshon ta ofresé klaridat pa ku e kalidat di e maneho di informashon, e problemanan i e riesgo i rekomendashonnan pa posibel direkshonnan di solushon den un organisashon.
Formanan di supervishon
Archivo Nashonal ta apliká diferente forma di supervishon, kada un dirigí riba nan propio grupo di enfoke i tipo di aserkamentu. Aparte di esei e ta reportá n’e funshonario di maneho responsabel i tambe na e funshonario ku tin e responsabilidat máksimo pa ku e maneho di archivo, e minister konserní, ora ku inspekshon dikta esaki nesesario.
Inspekshon di kalidat
E inspekshon di kalidat ta sòru pa duna e gerensia di un organisashon bista riba funshonamentu di e maneho di informashon i archivo, pa señalá e puntonan fuerte i debil, indiká riesgonan i ofresé rekomendashonnan pa mehorashon di kalidat. Aparte di esei, tur aspekto di maneho di informashon i archivo ta ser analisá di manera koherente, i un kriterio tripartit di kalidat ta na vigor: balor agregá pa e prosesonan di trabou, maneho legal basa riba legislashon i reglamentashon i finalmente maneho efisiente.
Inspekshon a base di tema
Archivo Nashonal por ehekutá inspekshonnan temátiko tambe. Esei ta nifiká ku ta ehekutá inspekshonnan a base di un tema en partikular, manera e estado di e espasionan di archivo òf e kalidat di personal.
Inspekshon insidental
Sierto situashonnan, manera determiná un espasio di archivo, implementá un sistema di informashon nobo òf un kalamidat manera un inundashon por ta motibu pa un inspekshon insidental.
Kiko t'e ròl di inspekshon na Archivo Nashonal?
Inspekshon di archivo su ròl primordial ta vigilá e kalidat di e maneho di informashon i archivo. E ta usa e legislashon i reglamentashon di archivo, stipulá den Archieflandsverordening 2007. (P.B. 2008 no. 7) komo kuadro di evaluashon. E ta aktua profeshonal, ku konvikshon pero tambe komprometé i realístiko, ku wowo skèrpi pa logra e metanan di e instansianan di gobièrnu den nan totalidat.
Archivo Nashonal
Scharlooweg 77-79
Tel. 461-4866 - Fax. 4616794
