Proyekto di selekshon
Na 2017 a kuminsá ku un proyekto di selekshon ekstenso. Denter di un periodo di dos aña, un tim di sinku profeshonal di selekshon eksperensiá, a selektá e archivonan gubernamental di añanan 1939 pa 2010, ku tabata wardá na depósito na Big One (Gosieweg). E idea ta pa e volúmen di archivo gubernamental ekivalente na dos kilometer largu, baha te ku un 10 pa 15% i pa traspasá e dokumentonan histórikamente balioso di manera inventarisá pa Archivo Nashonal. Finalmente e dokumentonan aki ta bira disponibel pa abo, e bishitante. Esaki ta nifiká un adelanto enorme pa nos servisio na kliente. Di 1969 te ku resientemente Archivo Nashonal a pone solamente archivonan di gobièrnu di te aña 1939 na disposishon di públiko. Aktualmente por konsultá e archivonan di gobièrnu te 2010 tambe. Un parti di e dokumentonan tokante di tempu kolonial, periodo di guera, e periodo kompleto di pais outónomo Antia Hulandes ya kaba a bira disponibel pa investigashon históriko. E proyekto di selekshon aki lo fungi tambe komo lugá di stazje pa studiantenan di Skol di Archivo.
Skol di Archivo
Meta di e Skol di Archivo ta pa prepará un staf nobo di funshonario di maneho di dokumento na Kòrsou. Esaki no ta solamente nesesario pa Archivo Nashonal sino tambe pa tur ministerio. Resientemente Archivo Nashonal tabata dispone di un staf di funshonario kualifiká ku den pasado a sigui un estudio stipulá pa lei na Skol di Archivo na Den Haag. Di e seis funshonarionan ei, sinku ta ku penshun. E ministerionan tin un retraso di mas ku 40 kilometer largu di archivo ku ainda mester keda selektá i traspasá. Den e ministerionan tin un gran eskases di funshonario pa hasi selekshon den den e archivonan. Tambe e estudio nobo a prepará un kantidat di spesialista di selekshon di i agentenan di informashon, ku por funshoná riba nivel di maneho denter di e aparato.
MIGAN / AtoM
MIGAN ta para pa “Memory of the Islands: Gateway to Archival Networking”. Ta un proyekto di koperashon ku ta kana via CARBICA, de Caribbean Branch of the International Council on Archives. Algun miembro di CARBICA a bai di akuerdo pa interkambiá un selekshon di nan kolekshon i hasi esaki aksesibel via un portal di wèpsait. Ta trata di kolekshonnan ku tin un importansia komun pa Karibe. E interkambio di dato entre e diferente miembronan di Karibe ta hasi investigashon históriko komparativo posibel. Kòrsou, Martinique, Sürnam, Trinidad & Tobago i Guadeloupe ta koperando ku otro. E koperashon aki ta enserá tambe un programa di treinen spesial p'e miembronan pa ku standarisashon di dato.
Pa por interkambiá e diferente datonan, mester transformá nan segun un standart internashonal pa deskripshon di archivo, titulá AtoM (Access to Memory). E programa Memorix ku Archivo Nashonal ta usando for di 2017 tin e mesun standart menshoná. Archivo Nashonal su intenshon ta pa no solamente transformá e kolekshonnan selektá segun e standart aki sino pa deskribí tur su inventario di e manera ei. Esei a hasi posibel ku por konsultá e inventarionan di Archivo Nashonal via internèt.
Banko di Imágen/ Registro di Imágen
E Banko di Imágen di Archivo Nashonal ta eksistí for di 2016. E intenshon ta pa tur portrèt den nos kolekshon bira aksesibel di manera digital den e banko aki. Pa por logra esei mester deskribí informashon di kada portrèt. Boluntarionan ku ke i por yuda ku e tarea aki ta mas ku bon biní. Esaki mirando ku riba e portrètnan tin hopi edifisio, kara i susesonan di ántes ku nos ke logra rekonosé. Si dado kaso bo kier yuda, bèl nos libremente na 4614866 i inskribí p'e proyekto aki. Lo bo risibí un splikashon i treinen kòrtiku p’asina por deskribí e portrètnan for di kas òf yuda nos skèn e portrètnan.
Inventarionan online
E inventarionan ta disponibel online for di 2017. Públiko for di kualke parti di mundu por konsultá i buska kualke tema den nos inventarionan.
Datonan pa investigashon di palu genealógiko online
Inisialmente Archivo Nashonal a pone e índisenan di Registro Sivil online, via e wèpsait WieWasWie.nl. For di 2017 e índisenan aktualisá ta disponibel riba e wèpsait di Archivo Nashonal mes, www.nationaalarchief.cw.
