Archivo Nashonal ta hunga un ròl importante den e suministro di informashon públiko di nos pais. E ta e punto final den e siklo di bida di archivonan di gobièrnu. Pa por sirbi hinter e aparato di servisionan gubernamental i fasilitá e fluho di archivo di tur e servisionan di gobièrnu pa Archivo Nashonal, Archivo Nashonal a krea tres área di trabou primario den e organisashon. Ta trata di e áreanan di Input, Prosesamentu (Processing) i Resultado final (Output) di suministro di informashon públiko.
- E Input ta kai bou di enkargo e departamento di Inspekshon i Atkisishon. E departamento aki ta pèrkurá pa for di un prinsipio archivonan nobo por keda traspasá pa Archivo Nashonal den un bon estado i forma ordená.
- E parti di Prosesamentu ta bou di enkargo di e departamento di Maneho di archivo i Servisio. E departamento aki ta dediká na e prosesamentu, ku ta nesesario pa pone archivonan na disposishon di públiko (e.o. restourashon, inventarisashon, digitalisashon, konvershon)
- E resultado final ta na enkargo di e departamento Maneho di Archivo & Servisio i tambe e departamento di Formashon. E departamentonan aki ta pèrkurá pa pone archivonan na disposishon di públiko den nos salanan di estudio di forma gratuito. Den otro palabra: realmente nan ta bira públiko. E departamentonan aki ta atendé kontaktonan direkto ku kliente pero tambe petishonnan pa informashon, ku ta drenta via telefòn, por eskrito i via e-mail. E departamento di Formashon ta sòru p’e promoshon aktivo di e historia antiano, pa medio di por ehèmpel eksposishon, charla, kurso i foronan.
E tres tareanan primario ariba menshoná ta ser asesorá pa un departamento di asuntunan Personal i General, un sekretaria i un konsehero di maneho. Nan ta ehekutá e tareanan sekundario òf tambe yama tareanan di sosten. Archivo Nashonal ta traha segun plannan di maneho plurianual i plannan anual. Tur aña ta responsabilisá e tareanan pe medio di un relato anal. Pa loke ta e supervishon di maneho di informashon di gobièrnu, ta traha anualmente un rapòrt di inspekshon.
1. Input: Inspekshon & Atkisishon
E prosesonan primario di Archivo Nashonal ta kuminsá ku atkisishon di archivonan (digital òf riba papel) ku ta wardá na e diferente servisionan di gobièrnu sentral. Dado kaso e archivonan aki tin 20 aña di eksistensia, pa lei mester traspasá nan pa Archivo Nashonal. Ta traspasá solamente e archivonan no apto pa destrukshon (mas o ménos 10%). Tur sobrá ta ser destruí. E selekshon nesesario pa determiná esei ta parti di e maneho di archivo rutinario di e servisionan di gobièrnu sentral. E Archivero General di pais mester supervisá e maneho di archivo aki. Durante e inspekshonnan ta pone atenshon spesialmente na e maneho di selekshon di e servisionan. E inspekshonnan aki ta stimulá e aksesibilidat general i uniformidat den e maneho di informashon di gobièrnu. Finalmente inspekshon ta un instrumento pa mehorá e kalidat i aksesibilidat di atministrashon di gobièrnu. A kuminsá ku inspekshonnan for di 1996 i ta usa e datonan aki entre otro pa fiha e prioridatnan di maneho. Asina a krea un plan di aserkamentu pa selekshon di archivonan di gobièrnu, i por a fiha e nesesidat di espasio pa konstrukshon di e depósito nobo, a base di e datonan di inspekshon.
E departamento di inspekshon ta duna konseho solisitá i no solisitá i ta yuda husga e listanan di destrukshon, komo parti di e konsulta triangular legalmente obligatorio. E trabounan aki ta fasilitá e stipulashonnan di ‘Landsverordening openbaarheid van bestuur’ (kontestá un petishon pa informashon denter di 3 siman).
Archivo Nashonal ta atkirí banda di archivonan di gobièrnu, ku segun lei mester ser traspasá, tambe archivonan priva. E atkisishon di e último nan aki, mester sosodé di forma pro aktivo. Pa por hasi esei a fiha un profil di atkisishon. Ta atkirí archivonan priva ku ta suplementario pa archivonan di gobièrnu, te kaminda ta posibel. P’e motibu aki a añadí archivonan, manera archivonan eklesiástiko, archivonan di personanan spesífiko i algun archivo empresarial (Maduro & Curiel’s Bank, Spritzer & Fuhrmann, kolekshon di potrèt Fischer) n’e kolekshon históriko.
Algun di e atkisishonnan importante di e último añanan:
- Archivo di Kabinet van de Gouverneur van de Nederlandse Antillen (1951-2010)
- Archivo di Rapòrt di Departement van Ontwikkelingssamenwerking (1911) 1962-2010
- Archivo di Projectorganisatie Ontmanteling Nederlandse Antillen (2007-2010)
- Archivo di Bureau Constitutionele Zaken (1994-2010)
- Archivo di Bureau Overheidsinnovaties (BOI) (1994-2010)
2. Prosesamentu: Maneho di Archivo
Archivonan ku ser warda den e depósito Archivo Nashonal, ta pasa dor di un kantidat di proseso importante, pa kua e departamento di Maneho di Archivo ta responsabel. E departamento aki tin komo tarea pa transformá i mantené e archivonan den un estado bon, ordená i aksesibel. Pa por logra esaki por distinguí un kantidat di proseso:
- (Sekshon &) Inventarisashon;
- Restourashon & Benderei;
- Fotografia / Reprodukshon;
- Atlas topográfiko históriko & Material Oudio visual;
- Maneho di depósito.
(Selekshon &) Inventarisashon
En prinsipio por traspasá únikamente archivonan selektá bou di maneho di Archivo nashonal. Hasi selekshon di dokumento ta e tarea di maneho primordial di tur instansia ku ta warda dokumento (krea un archivo). I na Archivo Nashonal por hasi e dokumentonan traspasá, aksesibel (pa públiko).
Un ehèmpel di esaki ta e aktanan di Registro Sivil: Mediante un proyekto di diferente aña, Archivo Nashonal, ku yudansa di boluntarionan, a indeksá i hasi e aktanan aki aksesibel via internèt. Aktualmente por konsultá 112.032 akta di nasementu, 24.339 akta di kasamentu en 129.499 akta di fayesimentu via www.wiewaswie.nl
Archivo Nashonal a prosesá tur inventario den e programa Access to Memory (AtoM). Esaki ta un programa webbased, ku den futuro lo brinda e oportunidat konsultá e inventarionan via internèt. A deskargá e promé inventarionan riba internèt na aña 2015.. Na promé lugá a atendé e archivo kolonial i algun archivo di gobièrnu importante, inkluyendo e archivo di Gabinete di Gobernador di Antia Hulandes. AtoM ta un programa Open Source ku a ser desaroyá pa e empresa Kanades Artefactual, bou di ouspisio di International Council on Archives. Dosentenan di tantu Artefactual komo Hogeschool van Amsterdam a bin duna kolaboradónan di Archivo Nashonal kurso na Kòrsou. E proyekto ta ser ehekutá ku yudansa di boluntario.
Restourashon i Benderei
E sekshon aki ta responsabel pa warda e herensia den un bon estado òf restourá esaki. E aspekto mas importante di e trabou ta trata konservashon preventivo. Mester tene e dokumentonan den kondishon optimal i konstante. E departamento aki ta vigilá e kòntròl di temperatura, humedat di airu, sensibilidat pa ku rayo UV i e kondishon material di e dokumentonan. Un otro parti importante ta e konsientisashon di kon trata ku dokumentonan p’asina minimalisá e daño di uso òf konsulta regular. Kada grado di antigwedat ta rekerí su propio téknika spesífiko di konservashon i restourashon. Di e dokumentonan di papel òf pèrkamènt di mas antiguo te ku e dokumentonan digital di mas moderno: tur ta rekerí un kantidat di téknika pa por konservá nan p’e futuro generashonnan. Aki bou ta kai tambe konvershon i migrashon di dokumentonan (digital).
Fotografia / Reprodukshon
E sekshon aki trata e petishonnan pa reprodukshon fotográfiko òf digital. Banda di esei e ta registrá e kambionan karakterístiko di e sosiedat antiano di manera fotográfiko i ta duna asistensia na momentu eksposishon, publikashon i presentashonnan. Digitalisá òf traspasá korant riba microfilm tambe ta un tarea di e sekshon aki.
Atlas topográfiko históriko & Material Oudio visual
E sekshon aki su meta ta pa kompilá, konservá, ordená, hasi material visual relevante pa Kòrsou disponibel i manehá esaki di manera profeshonal. E kolekshon ekstenso di portrèt i negatif, mapa, pintura, skèts, karta, grabashonnan di oudio i visual ta keda krese pa medio di atkisishon, donashon, reprodukshon, produkshon i kompra. Ta warda e materialnan aki den un depósito apartá (èkstra friu).
Maneho di depósito
E sekshon aki ta responsabel pa e logístika entre e salanan di estudio i e depósito di archivo. E ta un elemento klave pa garantisá un servisio efisiente na klientenan. E kolaboradónan di Archivo Nashonal ta tradusí e preguntanan di e klientenan den number di inventarisashon, i finalmente ta hiba e dokumento konserní p’e klientenan. E sekshon aki ta sòru pa un bon logístika den e depósito i pa pone archivonan resien atkirí primeramente den karentena.
3. Resultado final: Servisio & Formashon
E konsenshi nashonal tin un balor agregá esaki ta aksesibel i por ser konsultá. Despues di pasa dor di tur e prosesonan ku e departamentonan di Inspekshon & Atkisishon i Maneho di Archivo ta ofresé, ta sigui e resultado final: e suministro di informashon históriko na públiko. Archivo Nashonal ta garantisá públiko akseso gratuito pa ku dokumentonan original. En prinsipio dokumentonan di archivo wardá na Archivo Nashonal, ta kompletamente públiko, públiko por konsultá nan libremente.
Netamente p’e motibu aki Archivo Nashonal ta ofresé diferente sala di estudio: unu pa investigashon históriko general, unu pa investigashon genealógiko (investigashon di palu di famia), un sala pa konsulta di material oudio visual i un espasio apart pa konsultá ‘microfilm’.
E departamento di Servisio no ta sòru solamente pa atendé klientenan pero tambe pa buska klientenan nobo. Esaki ta sosodé pa medio di promoshon aktivo, charla, publikashon, kurso, dianan habri, tayer, eksposishon i rekoridonan.
