E inisio

Promé ku Archivo Nashonal Kòrsou, tabatin Archivo Sentral Históriko (ASH), ku a keda fundá 26 di ougùstùs 1969. Archivo Sentral Históriko tabatin komo enkargo pa mantené dokumentonan di gobièrnu den un estado bon i ordená, ku e meta pa pone nan disponibel na públiko i gobièrnu. Na promé instante a opta pa traspasá tur e dokumentonan te ku 30 aña bieu pa ASH. Na 1969 a traspasá tambe tur dokumentu di gobièrnu, di e periodo 1828 pa1939, pa ASH. Na aña 1989 a diseñá e promé Lei di Archivo, den kua a stipulá e periodo di traspaso di dokumento pa ASH na 40 aña. Aktualmente e periodo di traspaso ta 20 aña. E periodo di traspaso pa ASH ta koinsidí alabes ku e periodo di pone dokumentonan públikamente disponibel  di nos pais. Na momentu ku e departamentonan di gobièrnu traspasá nan archivonan selekshoná pa ASH, outomátikamente nan ta bira públiko.

E selekshon i traspaso di archivonan ta un proseso kontinuo. E fluho di dokumentu pa Archivo Nashonal, ta un prinsipio primordial den maneho di informashon. E ta forma parti di den e “Generally Accepted Recordkeeping Principles (GARP)”. E ta parti di e siklo di bida di informashon. 

For di su inisio, Archivo Nashonal a amplia su kolekshon pa medio di atkisishon aktivo i traspaso di archivonan, p’asina por ehèmpel archivonan mas antiguo manera esnan di parokianan katóliko i archivonan di for di establesimentu di “West-Indische Compagnie”, tambe por ta aksesibel pa públiko den nos salanan di estudio.  Di e periodo despues di 1940, algun archivo a keda traspasá: por ehèmpel e archivo di Gabinete di Gobernador(1951 – 2010) i e Archivo di Rapòrt di ‘Dienst Ontwikkelingssamenwerking (DEPOS)’. Den kaso ku ta nesesario, Archivo Nashonal ta amplia aksesibilidat di e archivonan risibí. Por hasi esaki pa medio di restourashon, traspaso di dato riba microfilm i digitalisashon. E aktanan públiko di Registro Sivil di Kòrsou (ántes di Antia Hulandes) ta ser indeksá digitalmente i ta aksesibel pa konsultá riba internèt.

Aparte di dokumentunan di gobièrnu, Archivo Nashonal a sa di atkirí archivonan privá interesante, tambe diferente korant, kasi 500.000 portrèt i negatif di portrèt, material oudiovisual di for di 1928 i un kolekshon amplio di mapa i pintura históriko. Huntu nan ta forma nos Memoria Nashonal. E kolekshonnan aki ta aksesibel pa tur hende di forma gratuito. E Memoria Nashonal ta fungi komo un sosten pa maneho di pais: e ta e depósito pa “dokumentunan di prueba” i informashon di maneho, ku ta na benefisio di un maneho públiko, eksakto i kontinuo. E Memoria Nashonal ta tambe na disposishon di públiko: e dokumentunan aki ta representá e historia skibí di nos pais.

E promé  Lei di Archivo (Archieflandsverordening 1989), a drenta apénas na vigor na aña 1996. For di e momentu ei servisionan di gobièrnu sentral tin e obligashon di selektá nan archivonan i traspasá esakinan pa Archivo Nashonal. E Lei di Archivo aktual, ku a keda aprobá na aña 2008, ta stipulá e periodo di traspaso na 20 aña. Ku e desishon aki, nos pais ta sigui e desaroyonan internashonal pa loke ta trata e término pa pone dokumentonan disponibel pa públiko. Pais Kòrsou a heredá archivonan no selektá for di su predesesor hurídiko (Antia Hulandes), ku a keda disolvé na 2010. Entretantu e retraso den (e proseso di ) selekshon di archivo di Pais Kòrsou a yega un volúmen di mas òf ménos 25 kilometer largu. Banda di esaki a heredá un kantidat adishonal di mas òf ménos 15 kilometer largu, for di Teritorio Insular Kòrsou, ku tambe mester pasa den e proseso di selekshon.

For di 1996 e Algemeen Landsarchivaris (Archivero General di pais) ta supervisá maneho di archivonan di tur servisionan di gobièrnu sentral i tambe ta inspekshoná ehekushon korekto di e” fluho” (“lifecycle”) di informashon di gobièrnu pa informashon públiko. Archivonan ta konsistí no solamente di informashon di gobièrnu riba papel, pero tambe di informashon kreá via medionan digital i otro tipo di medio.

Entretantu a laga traha un depósito hiper moderno na Archivo Nashonal, pa ubiká e archivonan di Antia Hulandes i Teritorio Insular di Kòrsou. E depósito aki a hasi traspaso selektivo berdaderamente posibel. Selekshon di e archivo semi státiko di 40 kilometer largu, di e predesesornan hurídiko di Pais Kòrsou, ku ainda ta ubiká na diferente servisionan di gobièrnu, lo resultá den un redukshon di volúmen di mas òf ménos 80 pa 90%. Dies porshento lo keda traspasá pa Archivo Nashonal i sobrá lo bin na remarke pa keda distruí. Esaki lo resultá den un redukshon di mas di un mion pa loke ta trata gastu di almasenamentu. Na 2017 a kuminsá, den kolaborashon ku Intercontinental University of the Caribbean (ICUC), ku un Estudio di Archivo na nivel di Bachelor. Den e estudio aki a prepará tambe studiantenan pa aportá di manera aktivo i konsistente na redukshon di e retraso den e proseso di selekshon di archivonan.