Dikon nos ta konservá nos historia?
Kada suseso, ta un suseso fo’i pasado. Na momentu ku bo kaba di lesa e frase aki, ya kaba el a bira pasado. Aworakí e ta fresku den bo memoria ainda, pero probablemente aki un siman, luna òf aki un aña bo a lubidá esaki. Mas leu den pasado un suseso a tuma lugá, mas nesesidat lo bo tin di medionan pa yuda bo pa rekord’é. Sí bo ke rekobrá un suseso fo’i pasado, bo mester hasi un investigashon; manera un ditèktif bo mester investigá diferente pista, detayenan chikí (òf grandi) ku a laga atras den pasado. For di eseinan por rekonstruí un suseso, di mesun manera ku un reshèrshi ta resolvé su kaso. Pistanan importante di pasado ta archivonan, pero meskos tambe kuentanan di bo abuelonan, sobrá di glas ku bo haña den tera, kustumber i kantikanan di ántes, por duna hopi indikashon.
Archivo Nashonal ta warda archivonan gubernamental i archivonan di persona- i instansianan importante den komunidat. Tur e ‘pistanan’ aki por yuda bo kontestá preguntanan tokante pasado.
Un archivo ta un forma partikular di informashon, ku ta keda formá durante ehekushon di un proseso. P’esei e denominashon, “informashon mará na proseso”. E ta otro fo’i informashon for di un buki òf for di un biblioteka, ku ta informashon prosesá, esta informashon den kua un outor a prosesá su interpretashon òf pensamentu. Informashon saká fo’i un archivo ta otro: ta trata di un fuente primario, sin interpretashon. Ta warda e informashon di tal manera, pa por trese un suseso for di pasado bèk, pa medio di e fuentenan di e tempu, sin adaptashon òf interpretashon di terser persona.
Aki bou nos a selektá algun tópiko di historia di Kòrsou. Bishitá nos eksposishonnan riba e wèpsait aki òf e tópikonan riba “Canon van Curaçao”. Nos ta spera ku esaki lo hasi bo kurioso pa hasi bo propio investigashon a base di fuentenan primario dje mesun tempu ei. Pasa na Archivo Nashonal libremente. Konsulta di e diferente fuentenan ta grátis i semper lo tin un hende pa asistí bo ku bo preguntanan.
