Deklarashon Universal di Archivo na Papiamentu riba wèpsait di ICA
Riba 10 di novèmber 2011, Asamblea General di UNESCO a aseptá e Deklarashon Universal di Archivo. For di 2018 por lesa e Deklarashon Universal di Archivo na Papiamentu tambe riba e wèpsait di International Council on Archives (ICA). Danki na studiantenan di skol di archivo na Kòrsou.
Archivonan tei pa registrá desishon, akshon i memoria. Archivonan ta úniko i nan ta un herensia balioso, ku no por wòrdu remplasá i ku ta pasa di generashon pa generashon. For di e fase di formashon, ta manehá archivonan di tal manera ku nan ta mantené nan balor i - nifikashon. Nan ta un fuente di informashon importante, ku ta sostené maneho gubernamental responsabel i transparente. Nan tin un ròl krusial den desaroyo di nos sosiedat, dor di salvaguardá i kontribuí na nos memoria individual i kolektivo. Akseso liber na archivonan lo enrikesé konosementu di nos komunidat, promové demokrasia, protehá derecho sivil i alsa e kalidat di bida.
Na momentu ku UNESCO a stipulá e Deklarashon Universal di Archivo (DUA), a referí na ekspreshonnan importante tokante konosementu i informashon. Entre otro na e propio konstitushon di UNESCO, ku ta suprayá e deseo di e paisnan miembro pa “apliká, amplia i kompartí konosementu”. Tambe a referí na e Deklarashon Universal di Derechi di Hende, ku ta stipulá ku ‘ku tur hende tin e derechi pa buska idea i informashon, risibí i (tras)pasá esakinan via tur medio, no opstante di kualke límite’. Huntu ku e prinsipionan formulá den e ‘Charter’ tokante preservashon di patrimonio digital i programa Memory of the World, e Deklarashon Universal di Archivo ta aspirá pa garantisá preservashon i aksesibilidat universal, di mundu su patrimonio dokumental. UNESCO ta motivá e paisnan miembro pa usa e prinsipionan nombrá den DUA komo guia, na ora di plania i ehekutá strategia i programanan di archivo na nivel nashonal den futuro.
