Konkista di Kòrsou na aña 1634
For di aña 1560 te ku aña 1640, Hulanda tabata enbolbí den un guera ku Spaña, pa por optené nan independensia. Pa motibu di e lucha aki, ku tabata eksigí hopi kapital, barku i sòldá, hulandesnan no a ehekutá biahenan di konkista na promé instante, ni nan no a yega di eksplorá den Karibe promé ku aña 1580. Esaki a kambia na momentu ku na aña 1580 Spaña a konkista Portugal i nan asosiashon ku Portugal a bira un echo (1580-1640). Spaña ta prohibí Portugal di sigui hasi negoshi ku Hulanda, su enemigu di guera. Hulanda tabata negoshá prinsipalmente salu ku Portugal. Pues unabes ku Portugal a kai den man di Spaña, Hulanda a hañ’e obligá di bai buska salu otro kaminda. E tempunan ei salu tabata hopi importante pa konserva kuminda, espesialmente piská. Na aña 1585, e promé barkunan hulandes a yega n’e kosta venezolano pa buska salu n’e saliñanan di Punto Araya, en frente di Kòrsou. Ora ku nan a kore ku e hulandesnan despues di un estadia kòrtiku na St. Maarten, HEREN XIX, e gerensia di West Indische Compagnie (WIC), ku tabata konsistí di 19 persona, a bai na pensa un manera pa yega na un base di defensa den Karibe, for di kua nan por a ehekutá tur nan operashonnan. Nan wowo a kai riba Kòrsou pa su hafnan bon situá, su ubikashon favorabel pa ku Venezuela i nan otro rutanan komersial di e tempu ei. Ademas, for di Kòrsou nan lo por a lucha kontra nan enemigu, Spaña.
Durante e reunion di 6 di aprel 1634, e direktornan di WIC a bai di akuerdo ku e plannan di konkista. A prepará un ekspedishon bou di liderazgo di Johan van Walbeeck i Pierre Le Grand. E ekspedishon a konsistí di 180 matros i 225 sòldá. Riba 28 di yüli 1634 nan a logra nabegá drenta haf di Kòrsou. E Spañónan a rendí rápidamente. A manda mayoria di e indígenanan, mas o ménos un 400, i 32 spañó pa Coro, Venezuela. Dia 21 di ougùstùs e kapitulashon a bira un realidat.
E mihó ilustrashon di kon hulandesnan a konkista Kòrsou for di e spañónan na aña 1634 ta un ilustrashon pintá pa Ruesta. E vershon original di e mapa aki ta wardá den e Archivo General de Indias, na Sevilla, Spaña.
Den e pintura por mira un “Armada Oladesa” di shete barku ku a drenta bahia di Santa Ana i nabegá bai parti wèst di Schottegat. E spañónan tabata defendé entrada di bahia di Santa Ana únikamente for di e banda ost, e banda di Punda, pa medio di un plataforma (V). E sòldánan a baha for di e barkunan den botonan mas chikí i a baha na tera na e península di Asiento. For di einan nan a sali via tera kue direkshon di “Pos Cabai”, kaminda tabatin un fòrki spañó. Riba e mapa bo por mira un “castillo” (kastel) pintá, rondoná di kanalnan (e deskripshon ta “Castillo en el sitio de la Higuera”). Loke ta interesante ta ku riba e mapa ta indiká dos “poblaciones” (pueblo, ku misa). E Población de Sta. Ana ta pintá na Bándariba, mas o ménos na altura di Matancia/ Rio Canario. Na Bándabou bo ta mira Población de Asencion pintá. Ta hopi probabel ku indígenanan a biba einan, mirando ku ta áreanan riku na awa.
Pa mas informashon tokante e tópiko aki wak tambe riba Canon van Curacao.
Publikashon:
De bewoners van Curacao, vijf eeuwen van lief en leed. Gibbes/ Romer-Kenepa/ Scriwanek
Portrètnan den e galeria:
1. Skèts di e konkista ehekutá pa Van Walbeeck pintá pa Francisco de Ruesta (1634)
2. Imágen di siglo 18 di e konkista di Johan van Walbeeck.
3. West Indisch Huis na Amsterdam, sede di Kamer van Amsterdam di WIC.
