Koperashon lokal i internashonal “Mutual Heritage Projecten”
E fuentenan di historia di Kòrsou no ta wardá solamente na Kòrsou. For di añanan ochenta kaba, Archivo Nashonal a entamá proyektonan pa disponé di reprodukshon di fuentenan relevante, p’asina bishitantenan na Kòrsou tambe por konsultá nan. Pa por logra esaki retnan di kontakto i koperashon riba nivel regional i internashonal ta fundamental. Esei ta stimulá, standarisashon, interkambio i best practices.
Danki na e proyektonan di pasa material riba microfilm di añanan ochenta, e Oud Archief Curaçao, wardá na Den Haag, por konsultá e archivo aki den e Reader Room di Archivo Nashonal.
Resientemente a digitalisá e “New Amsterdam Papers” (dokumentonan archivá na Albany, NY) i e registronan di e archivo di WIC (West Indische Compagnie) ku ta relatá na Kòrsou. Archivo Nashonal ta miembro di e asosiashon regional di Nationale Archivarissen uit de Caribische regio (CARBICA) i tambe di International Council on Archives (ICA).
Tin un obligashon hudisial pa interkambiá informashon entre e islanan di èks Antia Hulandes (Verdrag van Wenen 1983).
Archivo Nashonal ta miembro asosiá den e proyekto MIGAN. MIGAN, Memory of the Islands Gateway to Archival Networking, ta un plan ambisioso pa por interkambiá inventarionan di tur e miembronan asosiá di e region Karibense. Esei ta tuma lugá via un portal di wèpsait sofistiká. E proyekto aki, ku ta finansiá pa Union Oropeo, ta hasi interkambio di investigashon históriko komparativo posibel i duna un balor agregá na kada ken su ‘propio’ kolekshon. Un parti di e proyekto aki ta treinen di personal pa por introdusí standarisashon. Pa por logra esaki a tene tayernan di AtoM na Kòrsou na aña 2011. E proyekto AtoM/MIGAN ta un di proyektonan di término largu grandi di Archivo Nashonal, ku por ser integrá den otro proyektonan i ku por saka hopi bentaha (aksesibilidat, outomatisashon, konekshon ku e registrashon di bishitante i depósito) for di dje.
Riba nivel lokal Archivo Nashonal ta traha huntu ku Fundashon Amigunan di Archivo (Vrienden van het Archief). Tur kuartal e fundashon ta publiká un edishon dje revista, “De Archiefvriend”, konsistiendo di un kompilashon di artíkulonan históriko, mayoria di nan skibí for di fuentenan di archivo. Wèpsait di e fundashon: www.archiefvriend.com
