E mihó manera pa rekonstruí e desaroyo di Willemstad for di su inisio mas antiguo ta dor di uso di mapanan. E promé mapa, ku por mira na banda den e galeria di portrèt, ta data di aña 1634 (planonan), despues ta sigui un mapa di aña 1707 i unu di aña 1737. Na aña 1634, e aña ku Hulandesnan a konkistá Kòrsou for di e Spañónan, “de Punt”, o sea Punda, no tabata mas ku un tereno plat, un península di shete hèktar, yen di datu i mat’i sumpiña. Pa aña 1707, su aspekto a kambia totalmente: a konstruí Fort Amsterdam, parti nort di esaki tabatin un siudat rondoná di un muraya na tres banda, ku den dje kaya i hanchinan smal, kasnan di mas di un piso, di kua mayoria tabatin un galeria.
E direktiva i poder supremo di forsa militar a establesé nan mes einan, loke a kombertí Punda den e lokalidat mas importante di Kòrsou. Dirèkt despues ku hulandesnan a konkista Kòrsou, na yüli 1634, nan a establesé nan base kaminda awendia lanthùisnan Koningsplein i Pos Cabai ta situá. Riba “de Punt” a konstruí algun mekanismo di defensa. Na mart 1635 a kuminsá konstruí Fort Amsterdam. E kantidat di habitante ku tabatin e tempu ei (òktober 1634) tabata: 50 indígena i 412 “koppen”, di kua mayoria tabata militar i matrosnan. Na aña 1651 e promé grupo di hudiunan, enkabesá pa sr. Joa d’Yllan a yega Kòrsou, i na aña 1659 un grupo di hudiu relativamente grandi enkabesá pa sr. Isaac da Costa a bin establesé nan mes na Kòrsou. Inisialmente nan a establesé nan mes n’e parti nort di Schottegat, na altura di Plantage De Hoop òf "het Joodse Kwartier” i a kuminsá ku agrikultura. Pero no a tarda muchu ku nan a bai dediká nan mes na aktividatnan di komèrsio i ku nan a kumpra i laga traha diferente kas (di almasenamentu) den “Punda”, serka banda di Fòrti. E promé pruebanan di konstrukshon di kasnan di almasenamentu pa “negosiantenan” ta data for di aña 1664. Segun direktor Mathias Beck, tabatin 600 habitante blanku na Kòrsou na aña 1665.
E promé barku transportadó di esklabo “de Bontekoe” a drenta bahia di Santa Ana ku 191 esklabo a bordo. Na mitar di añanan setenta di siglo diesshete tabatin un fluho frekuente di barkunan transportadó di esklabo ta drenta Kòrsou, kaminda tabata sigui rebendé nan pa otro partinan di mundu. Un kantidat di e esklabonan aki tabata keda Kòrsou pa traha riba plantashinan i den stat, ku e tempu ei tabata konsistí di 214 edifisio. Na 1717 tabatin tambe 135 esklabo ta traha “achter het Fort(patras di fòrti)”.
Un punto ku tabata hopi importante den e desaroyo pa Willemstad bira un siudat, tabata e desishon di parlamento pa – despues ku e promé West Indische Compagnie a keda likidá – deklará e haf di Kòrsou komo ‘haf liber’. Riba 26 di aprel 1675 a tuma e desishon ku nos haf lo duna akseso na otro paisnan i personanan privá pa kumpra produkto i esklabonan na Kòrsou. E desishon aki tabata krusial pa e desaroyo di Willemstad pa bira un siudat di haf. A dèmpel un parti di Waaigat i amplia/ekstendé e murayanan di e siudat for di Fòrti te na Waaigat.
Pa kasi dos siglo largu ta e murayanan aki a dikta e fachada di e siudat. Te ora ku a basha nan abou, entre añanan 1861 i 1864. E tempu ei ya kaba Otrobanda tabatin mas habitante ku Punda. E promé barionan ku a surgi pafó di e murayanan di siudat ta Pietermaai i Scharloo. Na komienso di siglo binti, ku introdukshon di nabegashon a base di energia di bapor, haf di Willemstad a eksperensiá un bonansa, komo ku el a kuminsá fungi komo un bùnker pa warda karbon. Ku yegada di refineria na aña 1915, un era nobo a kuminsá.
Pa mas informashon:
Bo por buska den Archivo Nashonal Kòrsou òf wak riba Canon 10 di Canon van Curaçao.
Publikashon:
Van Punt en Snoa - B. Buddingh
Por reprodusí e teksto aki solamente ku menshon di e fuente: Archivo Nashonal Kòrsou.
